محافظات

فى رثاء أحمد أشرف من ذوى القدرات الخاصة الذى توفى اليوم

شيعت اليوم جنازة أبو قلب من ذهب أحمد أشرف شاب كان نفسه يعيش زيه زى غيرة كان كل حلمه أنه يحب ويتحب يلاقى اهتمام من كل اللى حواليه …أحمد زى الاف من اقرانه ذوى القدرات الخاصة كان نفسه محدش يعاملة بالعطف كأنه مريض أحمد كان نفسه يكون “عريس”يقعد فى الكوشة والدجية يشتغل واصحابه يرقصوا معاة زية زى كل الناس
أحمد أشرف كان نفسه يضحك من قلبة يرقص كان نفسه يفرح بحمل عروستة كان نفسه حد يقولوا يا بابا كان نفسه يعمل عيد ميلا لابنه اوبنته ويعزم جرانه واصحابه كان نفسه فى دقة الهون فى السبوع للمولود اسمع كلام ابوك متسمعش كلام أمك
أحمد كان نفسه يعيش عروسته تقولوا وهو فى الشغل هتيجى امتى ياحبيبى اعملك ايه على الغدا
أحمد كان نفسه فى حاجات كتيرررررررررر …أهمها انه يعيش لانه لحم ودم زيه زينا وربنا هو اللى خلقه بقدرات خاصة بس كان بيقول انا عاوز اعيش
مشى احمد اشرف من غير ما يودعنا بس نبهنا واحنا عملنا اننا مش واخدين بالنا وقولنا خلينا فى حالنا هى مش ناقصة …وزى ما ربنا خلقه كده يتولاه ….قال لنا كتير انا هنا انا هنا واحنا ودن من طين والثانية من عجين …مش شايفين الا غرورنا ونفسنا
وبعد ما مشى احمد قاعدين نقول ليه سيبتنا …مكان جنبنا …وقولنالوا كفاية انك عايش وسطنا …عاوز ايه تانى مننا …حقوقك عند ربنا مش عندنا …اللى زيك مش لازم يكون جنبنا
أحمد ربنا اختره عيشه افضل من عيشتنا وعروسة افضل من عرايسنا ربنا اختره يكون بجوارة الجنة تبقى مكانه والحور العين يبقوا عرايسه
نصيحة لنا كلنا اصحاب القدرات الخاصة زيهم زينا اوعوا فى يوم تهملوهم او تتجاهلوهم
لانهم مش زينا لا والف لا دول احسن بكتيرررررر مننا كلنا

اقسم بالله ماحزنت يوما مثلما حزنت على احمد اشرف واشهد الله اننا كلنا مقصرين وكلنا جناة المجتمع كله لازم يكون فى قفص الاتهام احد نموذج لمليون احمد عايشين ومش عايشين رحم الله احمد اشرف اللى مات ويرحم الله احمد اشرف الالاف اللى لسه عايشين ومش عايشين ومستنين دورهم ؟؟؟؟؟

فسيح جناته

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى